Hanna Hlíf Bjarnadóttir opnar sýningu á málverkum í Listhúsi Ófeigs, Skólavörðustíg 5 laugardaginn 1. nóvember kl. 15 – 17.

Á sýningunni eru verk máluð yfir gamlar myndir og gömul verk sem hún kaupir í ramma á nytjamörkuðum.

Verkin eru af blómum í fallegum litríkum vösum. Margir blómvendirnir virðast þokukenndir á meðan skörp og litrík mynstrin á vösunum eru skýr.  Sýningin er haldin í tengslum við sextíu ára afmæli Hönnu Hlífar 1. nóvember. Sýningin er opin á verslunartíma Ófeigs Gullsmiðju.

„Það er með djúpri þökk og virðingu sem minnst er Bjarna Geirs Alfreðssonar, veitingamanns og frumkvöðuls, sem lést á dögunum,“ segir á heimasíðu Kokkalandsliðsins:

„Bjarni Geir fæddist í Reykjavík árið 1951 og helgaði líf sitt matargerð, þjónustu og mannlegum samskiptum. Hann var menntaður matreiðslumeistari, útskrifaður frá vetingastaðnum Óðali við Austurvöll, og var fyrsti neminn sem lauk þaðan námi árið 1972.

Eftir útskrift hóf hann fjölbreyttan og litríkan starfsferil á mörgum kunnuglegum stöðum, meðal annars á Naustinu, á Skrínunni við Skólavörðustíg, á Ask við Laugaveg, og hann stofnaði sjálfur veitingastaðina Grillborg og Versali í Kópavogi, Stélið í Tryggvagötu, Rauða sófann á Hlemmi og Árnesti í Ármúla. Verk hans báru keim af eldmóði, hugviti og trú á íslenska matarmenningu.

Frá árinu 1996 rak hann veitingasöluna Fljótt og Gott á BSÍ, sem varð fljótt eitt kunnasta kennileiti ferðamanna og Íslendinga á ferðinni. Bjarni tók við rekstrinum á tíma þegar veitingasalan var að dragast saman, en með einurð, vinnusemi og ástríðu fyrir góðum mat tókst honum á innan við tveimur árum að snúa rekstrinum við og byggja upp blómlega starfsemi. Hann lagði áherslu á íslenskar hefðir í einföldu og hlýju umhverfi, og sagði oft með brosi að hann vildi bjóða fólki upp á „kjamma og kók“  sem varð landsþekkt slagorð. 

Bjarni var einnig lengi viðlóðinn kaffistofu Samhjálpar, þar sem hann lagði sig fram um að styðja þá sem áttu um sárt að binda. Þar nýtti hann bæði fagþekkingu sína og hlýtt hjarta til að skapa hlýlegt umhverfi og mannsæmandi máltíðir fyrir gestina. Starf hans þar var ekki aðeins þjónusta heldur köllun, og endurspeglaði trú hans á virðingu, umhyggju og reisn allra manna.

„Í dag er gleðidagur, 4 ár frá brúðkaupsdeginum okkar sem var mikil gleðiveisla,“ segir Hermann Guðmundsson forstjóri Kemi sem heldur upp á daginn í hitabeltinu með sinni ástkæru Svövu Gunnarsdóttur:

„Þar sem við erum stödd í hitabeltinu þá verður farið í golf á okkar heimavelli og síðan á frábæran veitingastað í kvöld þar sem við skálum fyrir frábærum 4 árum og skipuleggjum næsta ár. Það er mjög skemmtilegt að hafa gaman!“

„Stemning sem var“ er yfirskrift sýningar listamannsins Guðmundar Einars sem stendur yfir í Skotinu á Ljósmyndasafni Reykjavíkur 30. október til 31. desember 2025. Á henni birtast okkur það sem hann kallar: „sjúskaðar en heiðarlegar leifturmyndir úr nálægri en rómantískri fortíð.“

Á tímabilinu 2010-2018 tók Guðmundur Einar mikinn fjölda mynda af fólki og hlutum sem gripu auga hans – aðallega í Reykjavík en einnig í Lundúnum og New York. Myndirnar, sem hann framkallaði ekki fyrr en nýverið, fanga stemningu þessa tímabils, og þegar hann sá þær áttaði hann sig á því að fyrir honum væru þetta dýrgripir.

Siglufjarðarskarð Fljótamegin 20. júní 1950. Snjódýpt 5-8 metrar.