Gunnar Lárus Hjálmarsson, Dr. Gunni, heldur upp á sextugsafmæli sitt á Catalínu í Kópavogi í dag.
„Það verða pulsur og nammi og iðandi spilirí. Allir velkomnir,“ segir afmælisbarnið.
DANSKA ÞJÓÐÞINGIÐ SETT Í DAG – ALLIR SYNGJA ÞJÓÐSÖNGINN
Danska þjóðþingið verður sett í hádeginu í dag, 7. október. Hátíðlegt samkvæmt venju, guðsþjónusta í Slotskirken, kongungsfjölskyldan mætir, forsætisráðherrann heldur tölu og kosið verður í nefndir og ráð.
Þarna verða Friðrik konungur og Mary drottning. Margrét drottning og Benedikta systir hennar og prinsessa.
Við þingsetningu í fyrra var tekin upp sá siður að ljúka fundi með því að syngja danska þjóðsönginn,“ Det er et yndigt land“. Verður kór tónlistarskólans í Hvidovre þar fremstur og allir þingmenn syngja með – 179 talsins.
BRITT EKLAND (83)
Sænska leikkonan Britt Ekland er afmælisbarn dagsins (83). Þekktust á árum áður fyrir að vera ein af fjórum eiginkonum gamanleikarans Peter Sellers og Bondstúlkan í The Man with the Golden Gun.
FELIX SETTI STRIK Í FORSETAREIKNING GNARR
Allt stefnir í að sjónvarpsþáttaröðin Felix og Klara, samvinnuverkefni Jóns Gnarr og Ragnars Bragasonar, ætli að slá í gegn á landsvísu eftir fyrsta þáttinn sem sýndur var á RÚV í gær.
Upp úr stendur ótrúleg umbreyting á Jóni Gnarr í alhlutverkinu þar sem hann er sminkaður áratugi inn í framtíðina. Við tökur á þáttunum tók það sminkurnar fjóra klukkutíma að breyta Jóni í eldri borgara og aðra tvo að fjarlægja sminkið – fyrir og eftir hverja töku og þær voru margar.
Á sama tíma var Jón Gnarr í framboði til forseta Íslands og truflaði þetta umstang að sjálfsögðu kosningabaráttu hans því tíminn er takmarkaður. Hefði frumsýning þáttanna um Felix og Klöru verið skömmu fyrir forsetakosningarnar væri Jón Gnarr að öllum líkindum forseti Íslands í dag.
HRUNIÐ 17 ÁRA – HEFÐI ALDREI ÞURFT AÐ SEGJA „GUÐ BLESSI ÍSLAND“
“Hrunið” á 17 ára afmæli í dag. Ég held upp á daginn með því að rifja upp texta úr Mbl.-grein 15. apríl 2008. Tillagan rataði lítið breytt inn í Neyðarlögin,“ segir Ragnar Önundarson fyrrum bankastjóri og samfélagsrýnir:
–
„Seðlabankinn bauð mér til fundar út af henni í júlí 2008. Tveir bankastjòrar og einn ráðuneytisstjòri voru á fundinum. Hugmyndin kom um síðir fram lítið breytt í Neyðarlögunum, en ef hún hefði verið nýtt strax hefði ekkert „hrun“ orðið. Það hefði aldrei þurft að segja “Guð blessi Ísland”. Á fundinum var mér sagt að ekki hefði reynst skilningur meðal stjòrnmálamanna á að aðgerða væri þörf:
–
„Ábendingar um aðgerðir.
Aðgreina ber sem fyrst innlenda bankastarfsemi frá annarri og flytja í sérstök ný dótturfélög. Ríkissjóður láni bönkunum fyrir hlutafjárframlagi til hinna nýju félaga, gegn veði í hlutabréfunum. Kröfur á og skuldbindingar við þá sem búsettir eru á Íslandi eiga heima í hinum nýju félögum. … Unnið verði að viðskiptalegum aðskilnaði nýju bankanna frá móðurbönkunum strax í framhaldinu, svo skilja megi þá frá þeim án fyrirvara. Flutningur viðskiptanna í ný félög yrði ekki riftanlegur af því að gerningurinn yrði kröfuhöfum móðurbankanna í hag. Ástæðan er sú að eigið fé þeirra stæði þá eftir til stuðnings þeim eingöngu. Að auki verður ekki séð að mismunur sé á gæðum erlendra og innlendra eigna. Veðtakan í hlutabréfunum yrði ekki heldur riftanleg, af því að nýtt lán fylgdi. Sjálfs er höndin hollust.
–
Gert verði alveg ljóst að íslensk stjórnvöld muni ekki koma frekar að fjárhaglegri endurskipulagningu banka, að öðru leyti en því að leysa áðurnefnd ný dótturfélög um innlenda bankastarfsemi til sín, ef á þarf að halda. En komi til þess felst sem fyrr sagði kjarabót í því fyrir hina ótryggðu kröfuhafa því þá minnkar efnahagsreikningur bankanna og hlutfall eigin fjár hækkar að sama skapi”.
PIZZA 67 LIFIR Í FÆREYJUM
Pizza 67 sló rækilega í gegn á Íslandi fyrir síðustu aldamót en fjaraði einhvern veginn út. Hún lifir samt góðu lífi í Færeyjum með sama stæl og stíl og áður hér á landi.
SVÍN Í SUNNUDAGSGÖNGU
Svín í sunnudagsgöngu á Möðrudalsöræfum í haustbirtunni. Hvað vakti fyrir því er ekki vitað en það gekk réttu megin á götunni – gegn umferð.
VATN ÚR GEYSI Á HÓTELI Í KEF
Airport Hotel Aurora á Keflavíkurflugvelli auglýsir íslenskt vatn fyrir gesti sína, beint úr goshvernum Geysi, gott til baða og drykkjar. Þá eru gestir hvattur til að endurnýta handklæði á herbergjum til bjargar hafi og ám.
HUGLEIKUR (48)
Hugleikur Dagsson, beittasti blýanturinn í íslensku skopskúffunni, er afmælisbarn dagsins (48). Hann fær óskalagið Mind Games (Hugleikar):
JAPAN LOKAR Á ÍSLAND
Japanska sjónvarpsstöðin NHK World Japan er hætt útsendingum á Íslandi. Hægt var að fylgjast með stöðinni í sjónvarpi Símans en ekki lengur og sakna margir Einn áskrifandi Símans orðar það svo:
„Þetta er fræðandi og uppbyggjandi sjónvarpstöð sem veitir innsýn í japanska menningu og tæknilegar framfarir og daglegt líf Japana. Eitthvað sem Íslendingar ættu að taka sér til fyrirmyndar.“
