Frumraun Nínu Ólafsdóttur, Þú sem ert á jörðu, hefur vakið óvenju mikla athygli frá útgáfu. Bókin kom út í september 2025 og seldist fyrsta upplag upp fyrir jólin. Í kjölfarið var hún endurprentuð og er nú þriðja prentun komin í dreifingu.
Þú sem ert á jörðu, hefur einnig vakið verðskuldaða athygli erlendis. Að sögn umboðskrifstofunnar Reykjavík Literary Agency hefur bókin nú verið seld til átta markaða: Noregs, Danmerkur, Tékklands, Bretlands, Ungverjalands, Slóveníu og til hins spænskumælandi heims, auk Frakklands þar sem útgefendur yfirbuðu hvern annan í baráttu sinni um réttinn.
„Það er verulega ánægjulegt að upplifa svo mikinn spenning fyrir höfundi eins og Nínu Ólafsdóttur, sem er að stíga sín fyrstu skref sem rithöfundur en á svo sannarlega framtíðina fyrir sér, bæði hér á Íslandi og erlendis,“ segir Stella Soffía Jóhannesdóttir hjá Reykjavík Literary Agency og bætir því við að verið sé að semja um útgáfuréttinn á fleiri mörkuðum.
