Lásinn hélt á vönduðu reiðhjóli sem fest var við nýjan hjólastand á nýuppgerðri göngugötu á Hlemmi. Þjófarnir létu það ekki stöðva sig heldur skrúfuðu af hjól, bretti og allt saman. Skildu stellið eftir enda var það vel fest með lásnum við hjólastandinn nýja.
ÍSLENSKI FÁNINN Á JÓLASERVÍETTUM
Farið er að nota íslenska fánann á jólaservíettur. Hægt er að fá þær í Partylandi í Holtagörðum, 20 stykki á 1.290 krónur. Líka má finna þær í Krónunni innan um annað jólasskraut.
HVORT Á AÐ SEGJA FISKBOLLA EÐA FISKIBOLLA?
„Hvort á að segja fiskbolla eða fiskibolla?“ spyr Benedikt Björgvinsson á umræðuvefnum Málspjall sem Eiríkur Rögnvaldsson stjörnumálfræðingur stjórnar. Og ekki stendur á viðbrögðum:
–
Þorbjörn Tobbitenor Rúnarsson: „Skiptir bara engu máli. Mátt þess vegna kalla þetta hakkaðar fisk- og laukkúlur með kryddi. Alveg eins og brauðtertur mega heita samlokukökur. Hver og einn er vanur sínu. Mínar heita fiskibollur. Hver ein og einasta.“
–
Ármann Kári Guðjónsson: „Á mínum bæ er alltaf sagt fiskibolla. Annað er bara asnalegt.“
–
Margrét S. Jóhannsdóttir: „Ég hef ekki heyrt annað en fiskibolla, er nú orðin 84 ára og alin upp og bý enn í sjávarþorpi.“
–
Sveinbjrön Egilsson: „Mér er alveg sama. Ég borða bara matinn, spyr hann ekki að nafni.“
–
Hlín Önnudóttir: „Á mínu heimili var það þannig að fiskbollur í dós sem voru soðnar voru fiskbollur en hinar sem voru grófari og steiktar á pönnu voru fiskibollur. Mér fannst þetta bara mjög rökrétt.“
–
Emelía Kristjánsdóttir: „Mamma mín sagði alltaf ‘fiskabolla’.“
–
Margrét Hlíns Sveinsdóttir: „Fiskbollur og kjötbollur. Ekki fiskibollur og kjötibollur.“
–
Jóhann Örn Arnarson: „Fiskbolla úr einum fiski, fiskabollur úr mörgum fiskum.“
–
Svo kemur stjórnandi síðunnar, Eiríkur Rögnvaldsson, og kveður upp sinn dóm: „Fiskibolla“ er það venjulega, sérstaklega í seinni tíð, en „fiskbolla“ er líka algengt og jafnrétt.“
RÓSA (60)
Rósa Guðbjartsdóttir alþingiskona og fyrrum bæjarstjóri í Hafnarfirði er sextug í dag. Hún fær óskalagið Roses Are Red (My Love) með Bobby Vinton:
STREISAND TÆTIR TRUMP Í SIG
Stórstjarnan Barbra Streisand tætti útlendingastefnu Trumps forseta í sig í sjónvarpsþætti hjá CNN af þvílíkum krafti að stúdíóið fraus:
–
„Þú ert að aðskilja fjölskyldur eins og heigull sem felur sig á bak við rautt bindi,“ sagði Streisand og bætti við:
–
„Þetta fólk er ekki ólöglegt. Þetta er fólkið sem týnir ávexti okkar, byggir vegi og brýr. Þetta er fólkið sem heldur heiminum gangandi svo þú getir flogið um í risaþotunni og kallað sjálfan þig mikilmenni.“
KJAFTSHÖGG HVERN EINASTA DAG…
Íslenskir dægurlagatextar eru allskonar og margir fá ýmsar útgáfur þeirra á heilann við ákveðnar aðstæður. Fræg er sagan af manninum sem fær Snæfinn snjókall á heilann alla júlímánuði og svo hinn sem losnar ekki við Ég er kokkur á kútter frá Sandi og hefur sú árátta staðið í mörg ár. Textinn er svæsinn – eftir Örnólf í Vík og lagið eftir Ólaf Gauk.
Ég er kokkur á kútter frá Sandi.
Ég fæ kjaftshögg hvern einasta dag.
Og ekki líður með betur í landi.
ef ég lendi við konu í slag.
NÝJAR SÁNUR OPNAÐAR Í VESTURBÆJARLAUG EFTIR HELGI
Þriðjudaginn 2. desember kl. 07:30 verða nýjar og glæsilegar sánur opnaðar í Vesturbæjarlaug. Af því tilefni verður frítt í laugina frá 07.00 til 10.00 þann dag, og léttar morgunveitingar og ljúfir tónar í boði. Borgarstjóri mun opna nýju sánurnar við hátíðlega athöfn kl. 07.30 og eru öll hjartanlega velkomin.
.-
Hönnun nýju sánurýmanna var í höndum Hebu Hertervig og Steinunnar Halldórsdóttur hjá VA arkitektum. Þeim tókst að skapa nútímalegar, fallegar og notalegar sánur sem halda þó í upprunalegan anda og sérkenni mannvirkisins.
ÓSKAR Á TOPP 10
Vinsamlega réttið úr sætisbökunum, sögur Óskars Magnússonar, rithöfundar fara beint á topp tíu bóksölulista Eymundson. Óskar er bóndi, stjórnarformaður Eimskips, sóknarnefndarformaður og Guð má vita hvað annað. Hann hefur áður skrifað smásagnasöfnin, Borðaði ég kvöldmat í gær og Ég sé ekkert svona gleraugnalaus.
Í eina tíð sagði Séð og heyrt um þennan þá forstjóra Vodafone að hann væri ,,Virðulegur æringi.“ Það hefur lítið breyst.
ALLIR Í ÁRBÆ 1. DES.
Í tilefni fullveldisdagsins þann 1. desember kl. 18-22 efna Árbæjarsafn, Félag harmonikuunnenda í Reykjavík, Heimilisiðnaðarfélag Íslands, Kvæðamannafélagið Iðunn og Þjóðdansafélag Reykjavíkur til fögnuðar á Árbæjarsafni. Frítt inn!
Gestum gefst færi á að kynnast gömlu dönsunum, handverki, harmonikum, kveðskap, þjóðbúningum, þjóðdönsum, þjóðlögum og þeim menningararfi sem iðkaður er af félögunum sem að viðburðinum koma auk þess að kynnast starfi félaganna. Á viðburðinum verða skemmtileg örnámskeið og kynningar þar sem hægt verður að læra að sauma gamla íslenska krosssauminn og gera úr því lítið jólaskraut, læra grunnsporin í þjóðdönsum og kynnast kvæðalögum.
Dillonshús verður opið og býður upp á dýrindis veitingar
Í tilefni dagsins eru gestir hvattir til að mæta í þjóðbúning, en hægt verður að fá ráðgjöf varðandi búninganotkun og hvernig koma megi eldri búningum í notkun.
