Úrval verka frá spænska skartgripaverkstæðinu Joyas de la Raspa verða sýnd í Listhúsi Ófeigs við Skólavörðustíg á sýningu sem opnar laugardaginn 30. maí.
–
Verkstæðið var stofnað í Galesíu árið 1988 af Miguel Sánchez-Cantón og Virginia R. Lorenzo og hefur frá upphafi verið þekkt fyrir nútímaskartgripi innblásna af lífríki hafsins. Sardínur, kolkrabbar, skötur og marglyttur eru meðal myndefna í verkum þar sem handverk og tilraunir með fjölbreytt efni skapa einstaka heild.
–
Joyas de la Raspa hefur hlotið fjölda viðurkenninga á Spáni, meðal annars Landsverðlaun í handverki árið 2008 fyrir Abyssal-safnið, þar sem sjóslípað gler úr fjörum var notað sem lykilefni. Eftir fráfall Miguel Sánchez-Cantón árið 2020 hefur Virginia R. Lorenzo áfram leitt starfsemina og þróað myndheim sem sækir innblástur í Atlantshafið.
Sýningin markar jafnframt endurkomu verkstæðisins til Reykjavíkur en árið 2000 sýndi Joyas de la Raspa hjá Ófeigi sem hluti af Air-ring-sýningunni undir listrænni stjórn Matti Mattsson. Nú, rúmum tveimur áratugum síðar, snýr Virginia R. Lorenzo aftur með ný verk hjá Hildi Bolladóttur og Bolla Ófeigssyni.
