Olíumálverk eftir Ásgrím Jónsson var selt á 8,7 milljónir á uppboði hjá Gallerí Fold í gærkvöldi. Verðmat fyrir uppboðið var hærra – 10-12 milljónir.
Myndin heitir Í húsinu (á Eyrarbakka), máluð 1905 og hér er sagan:
–
„Árið 1890 gerðist hinn nýfermdi Ásgrímur Jónsson vikapiltur hjá danska verslunarstjóranum Nielsen í verslun J. R. B. Lefolii. Fjölskylda hans bjó í „Húsinu“ á Eyrarbakka sem á þeim tíma var eitt mesta menningarheimili landsins. Þar voru ekki aðeins myndir á veggjum heldur einnig eitt fyrsta píanóið í einkaeigu á öllu Suðurlandi. Dvölin í Húsinu hafði mikil áhrif á Ásgrím. Þar eignaðist hann sína fyrstu vatnsliti og notaði hverja lausa stund til að æfa sig að teikna upp myndir úr dönskum myndablöðum. Hið menningarlega andrúmsloft heimilisins hefur þó ekki skipt minna máli. Fimmtán árum síðar, að loknu námi í Danmörku, málaði Ásgrímur myndina Í Húsinu, þar sem heimilisfólk og vinir koma saman í stofunni og njóta tónlistar við skin olíulampans. Myndin ber akademískri menntun hans fagurt vitni og er einstakt í höfundaverki Ásgríms.“
