Sjónvarpsáhorfandi skrifar:
–
Eyjólfur Ármannsson innviðaráðherra er með sjónvarpstæknina upp á tíu eins og sást í fréttum á Rúv um fall Play. Þar var hann í beinni útsendingu frá ráðherraskrifstofunni, sem sagt ekki með tökumann frá fréttastofunni. Hljóð og mynd voru hins vegar til fyrirmyndar og ljóst að ráðherrann er með flinka ráðgjafa í þessum efnum.
–
Síma var stillt upp á þrífót til að taka myndina og þráðlaus míkrófónn tengdur við hann til að tryggja gott hljóð. Eyjólfur var síðan með eyrnatappa við símann til að heyra í fréttamanninum.
–
Þetta mega aðrir ráðamenn taka sér til fyrirmyndar. Æ algengara er að þeir eigi samskipti við sjónvarpsstöðvar í gegnum eigin síma eða fartölvur, oft erlendis frá. Versta útkoman er einatt gegnum fartölvurnar, þar eru myndgæði verri en í símum og mjög asnalegt þegar myndavél fartölvunnar dregur aðallega fram undirhöku viðmælandans.
