Ein vinsælasta og ódýrasta rakarastofa Reykjavíkur, Hárhornið á Hlemmi, flytur sig um set eftir 29 ára á horninu á Hlemmi. Ástæðan er hækkandi húsaleiga sem verður ekki við unað.

Torfi heitinn Geirmundsson hárskeri stóð þarna vaktina öll þessi ár þangað til hann lést en Lilja dóttir hans tók þá við og hefur rekið ásamt góðu fólki. En húsaleigan er komin upp úr öllu valdi.

Lilja og hennar fólk hefur tryggt sér annað húsnæði örspöl frá, á Rauðarárstíg 27, í 200 metra fjarlægð. Næg bílastæði, meira pláss – og helmingi lægri húsaleiga. Þar verður opnað í sumar.

Ítarleg grein um íslenska pylsumenningu birtist í New York Times í gær undir fyrirsögninni „Inflation Hit Iceland Hard. Even It Beloved Hot Dog“ – Verðbólgan leikur Ísland grátt. Jafnvel á hina ástsælu pylsu.

Sjá New York Times hér.

Nú getur þú loksins fengið íslenskt loft í Bónus. Takmarkað magn í boði.

Ásdís Rán er líka komin í bleikan pels eins og Steinunn Ólína hefur verið að flagga á samfélagsmiðlum. Báðar voru þær í forsetaframboði fyrir skemmstu – pretty in pink er þetta kallað.

Sjá tengda frétt.

Smáríkið er að gera klárt fyrir að opna á Granda, á besta stað við hliðina á Bónus. Sagt er að Vínbúð ríkisins hafi stefnt að því að flytja víbúðina í Austurstræti í þessa byggingu en þarna hefur Smáríkið sigrað Stórríkið í kapphlaupinu.

Greint var frá væntanlegri opnun Smáríkisins á Granda hér fyrir skemmstu þar sem kostir staðsetningarinnar voru taldir upp – Bónus, Krónan, Nettó, tvö apótek þvottahús og bílaþvottastöð. Í framhaldi barst póstur frá lesanda sem bætti um betur:

–

„Ekki gleyma því að langstærsta bókabúð landsins er úti á Granda og líka besta og vandaðasta vínyl-plötubúðin. Þá er þar að finna elstu rafhjólabúðina og vinsælasta golfherminn. Ekki má heldur gleyma Jysk, Prímavera í hádeginu, Farmers market og stærsta kjarna landsins af listamanna vinnustofum, sem margir myndu ætla harðduglegan markhóp.“