„Flest þurfum við minna áreiti og minni streitu í líf okkar. Því miður eru jólin tími mikillar streitu. Það eru þó ekki jólin sjálf sem valda óróleika í líkamanum heldur gervitakturinn sem hefur smám saman verið lagður ofan á þau,“ segir Auður Kjartansdóttir framkvæmdastjóri Skógræktarfélags Reykjavíkur í hugleiðingu í Morgunblaðinu á aðventunni:
„Ljósin, lögin og gleðin eru ekki.vandinn. Þvert á móti. Vandinn er þegar gervihávaðinn yfirgnæfir hið lifandi. Þegar jólin verða stöðugt ástand í markaðskerfinu í stað tímabils í lífinu. Þá fer hjartað að slá í takt við auglýsingar í stað árstíða.
Kannski felst ein einfaldasta forvörnin gegn „hjartsláttartruflunum“ jólanna ekki í því að slökkva á jólunum, heldur að velja þau meðvitað. Velja ljós en ekki flóðlýsingu. Velja lög en ekki stöðugan hávaða. Og velja lifandi tré í stað eftirlíkingar. Þá fær hjartað að slá í þeim hæga, stöðuga takti sem jólin eiga í eðli sínu að geyma.“
