Reykjavíkurborg í samráði við Heilbrigðiseftirlitið hefur ákveðið að ungmenni í Vinnuskólanum skuli ekki mæta til vinnu í dag vegna loftgæða og gosmengunar á höfuðborgarsvæðinu.
Um er að ræða hæstu gildi brennisteinsdíoxíðs sem mælst hefur á höfuðborgarsvæðinu frá upphafi eldsumbrota á Reykjanesskaga. Í morgun hafa mælistöðvar á höfuðborgarsvæðinu mælt há gildi brennisteinsdíoxíðs (SO2) og hafa hæstu 10 mínútna gildi farið upp í og yfir 2000 míkrógröm á rúmmeter.
Börn eigi ekki að vera úti og fullorðnir að forðast áreynslu utandyra. Þá eigi að slökkva á loftræstingu.
Öll ungmenni í Vinnuskólanum fá greitt fyrir daginn samt sem áður. Staðan verður metin aftur á morgun.
