Natalía er 18 ára, fædd og uppalin í Grindavík og gengur um beina á veitingastaðnum Papa’s, eina staðnum sem bauð upp á veitingar í bænum á sumardaginn fyrsta. Hún þurfti að yfirgefa Grindavík en mætir til vinnu þar og á sér þá ósk að komast aftur heim.
„Nú eru um hundrað manns í bænum sem búa hér og sofa en ekki ég ennþá,“ segir hún og líkt og tári bregði fyrir í auga en svo kemur bros.
Að aka um Grindavík er líkt og að fara um stríðssvæði. Yfirgefin hús, sum úr lagi færð, vírgirðingar víðast hvar og flóttaleiðir merktar í bak og fyrir. En sundlaugin er opin þó íþróttahúsið við hliðina sé ónýtt og grasvöllurinn fyrir knattspyrnu er að verða klár fyrir heimaleiki Grindavíkur í boltanum á næstunni. Yfirbyggði gervigrasvöllurinn er hins vegar fyrir bí.
Mitt í þessu er þó flaggað við Papa’s sem býður upp á frábærar veitingar og þar var stútfullt á sumardaginn fyrsta, mest túristar en líka heimamenn að horfa á boltann og spila biljard í hliðarsal. Einn ostborgari, 12 tommu pizza með pepperoni og piparosti, kaffibolli og lítil dós af original Coca Cola – fimm þúsund kall!
