Sýning Hildigunnar Birgisdóttur, Þetta er mjög stór tala — Commerzbau, sem var framlag Íslands til tvíæringsins í Feneyjum árið 2024 verður opnuð í Listasafni Íslands í dag, 22. febrúar. Þetta er innsetning með skúlptúrum sem verður aðlöguð að húsakynnum safnsins við Tjörnina í miðborg Reykjavíkur.
Sýningarstjóri var Dan Byers, umsjónarmaður nútíma- og samtímalistar hjá Williams College Museum of Art í Massachusetts.
Sýningin ögraði á gáskafullan hátt fyrirfram gefnum hugmyndum um fegurð, virði og notagildi í samhengi við þennan alþjóðlega listviðburð. Hildigunnur er kunn fyrir að gefa hinu smáa gaum í listsköpun sinni og varpa gagnrýnu ljósi á hnattræn framleiðslu- og dreifingarkerfi, sem og hið undarlega lífshlaup varningsins sem þessi kerfi skapa. Í verkum sínum dregur hún athyglina að litlum, einnota hlutum sem gjarnan eru fjöldaframleiddir fylgifiskar neyslumenningarinnar: umbúðum, verðmiðum, merkingum og útstillingareiningum. Hún fær þessum hlutum nýtt hlutverk en gildi þeirra og merking gjörbreytast þegar komið er út fyrir hið upprunalega samhengi þeirra.
