Donald J. Trump hefur leyst kvennamál elsta sonar síns, Donalds yngri, með því að skipa kærustu hans, Kimberley Guilfoyle, sendiherra Bandaríkjanna í Grikklandi.
Donald yngri skildi við eiginkonu sína, Vanessu, árið 2018 en þau eiga fimm börn. Samband hans og Kimberley hefur staðið síðan þá. Þau hafa ekki sést saman um skeið.
Donald yngri hefur sést opinberlega með annarri konu undanfarna mánuði og ekki leynt því að um rómantískt samband er að ræða. Hann fagnaði skipun Kimberley á samfélagsmiðlum en minntist ekkert á samband þeirra. Það gerði ekki heldur forsetinn verðandi en hann talaði um Kimberley sem fjölskylduvin.
Skipun þessi er sögð bera keim af þeirri spillingu sem Trump sjálfur lofaði kjósendum að uppræta. Kimberley hefur verið öflug í stuðningi við Trump og haldið ræður á framboðsfundum. Hún var áður gift Gavin Newscom ríkisstjóra Kaliforníu sem er Demókrati og er menntuð sem lögfræðingur auk þess sem hún var þáttastjórnandi á Fox sjónvarpsstöðinni.
