„Þeir sem hafa unnið með Jakobi Frímann oftar en einu sinni vita að þar er á ferðinni enginn venjulegur maður. Fyrir utan augljósa hæfileika til að skapa tónlist sem hreyft hefur við fólki í hálfa öld, þá er eins og hann sé á einhverjum sérsamningi við almættið,“ segir Einar Scheving trommuleikari sem var með Jakobi í Vaglaskógi um helgina:
–
„Jakob fær hugmyndir og almættið svarar honum yfirleitt með því að bæta um betur þannig að útkoman kemur honum jafnvel sjálfum á óvart.
Ein birtingarmynd þessarar samvinnu við almættið var hin sérlega vel heppnaða hátíð „Vor í Vaglaskógi“ sem Jakob hélt um helgina, þar sem sumarblíðan lék við rúmlega 7000 gestina.
Skömmu eftir að við Róbert Þórhallsson og Valbjörn Lilliendahl höfðum leikið með hliðarsjálfi Jakobs, Jack Magnet, þurftum við að ná flugi frá Akureyri til Reykjavíkur. Jakob vildi ólmur skutla okkur út á flugvöll, þótt ég reyndi að sannfæra hann um að fá annan í verkið, enda hefði hann í nógu að snúast sjálfur.
Hann svaraði að honum væri ljúft og skylt að keyra okkur á flugvöllinn og að síðan myndi Frímann flugkappi (nafni sinn og viðfangsefni samnefnds Stuðmannalags) leysa sig af hólmi og koma okkur áleiðis til Reykjavíkur.
Jakob var að sjálfsögðu að grínast, en þegar við vorum sestir um borð tilkynnti flugfreyjan að flugstjórinn í þessari ferð væri FRÍMANN Svavarsson!“
