Afmælistónleikar Helga Björns eru í Hörpu um helgina en Helgi þjófstartaði afmælinu í Hofi fyrr í haust.
„Við erum búin að vera að undirbúa þessa tónleika í meira en ár og viðtökurnar hafa farið fram úr væntingum. Nú er bara tilhlökkun og eftirvænting í hópnum. Það er yndislegt að fagna þessum tímamótum með þessum hætti,“ segir Helgi aðspurður út í stórtónleika helgarinnar en uppselt er á þrenna tónleika í Hörpu að undanskildum nokkrum sætum á föstudagstónleikanna.
–
Árið 1984 birtist Hið helga Bé sem fullsköpuð stjarna á himnafestingu íslenskrar rokktónlistar. 40 árum síðar hefur Helgi Björnsson gert heila þjóð að vini sínum, kynslóð fram af kynslóð. Jafnvel tíminn er vinur hans, enda hefur tíminn slípað þennan gimstein í áranna rás meðan Helgi hefur blygðunarlaust látið tímalausum perlum rigna yfir þjóð sem þyrstir eftir snertingu við hjartað. Íslendingum finnst þessi rigning góð og það rignir enn. Árið 2024 fögnum við 40 ára sígrænum ferli sem tímabundin trend ná aldrei að hagga. Maðurinn sem fer alla leið; jafnvígur á grátur, hlátur, öskur, stans, dans, stendur Hólí Bí á skýi og skýtur þig með ástarörvum í hjartað. Segðu já og við ríðum sem vindurinn í sumar og haust.
