Inga Sæland er ötull ráðherra og réttsýn þó sjónskert sé. Nú tilkynnir hún að 65 ára og eldri sleppa við árlega læknisskoðun til 75 ára til að halda ökuréttindum:
„Lengst af hefur eldra fólk verið skikkað í árlegar læknisskoðanir og endalaus vottorð til að halda ökuleyfi, oft án raunverulegs ávinnings. Nú er verið að breyta þessu, meðal annars með hliðsjón af því hvernig þessu er háttað í nágrannalöndunum.
Heilbrigði eldri borgara hefur stórbatnað og aldur einn og sér segir takmarkað um akstursgetu. Þess vegna verður lögð meiri áhersla á færni, heilsu og raunverulegar aðstæður.
Það er ekki um háa slysatíðni að ræða hjá fólki á aldrinum 65 til 75 ára. Hátt hlutfall slysa í umferðinni er frekar hjá yngri ökumönnum.
Þetta er skref í átt að mannlegra og nútímalegra kerfi. Minni skriffinnska, meiri virðing og einfaldara líf fyrir fólk.“
