Svo virðist sem keppnin á milli þessara tveggja heimsfrægu leikara eigi sér ekki eingöngu stað á hvíta tjaldinu. Hugh Grant (Love Actually, Four Weddings and a Funeral) sem er þekktur húmoristi gerir endalaust grín að aumingja Colin Firth sem er kannski ekki svo mikill Darcy þegar öllu er á botninn hvolft. Í nýju Bridget Jones-myndinni hefur mannréttindalögmaðurinn Darcy farist í hörmulegu slysi. Hugh Grant segir frá því í nýlegu viðtali við Seth Meyers (Late Night) að Colin sé samt dreginn upp á dekk svo kallgreyið fái einhver verkefni. Þeger Meyers spyr Hugh Grant hvort framleiðendur séu að gera góðverk í þessu tilviki, svarar hann ekki beint en segir að Colin Firth sjái sjálfur um að farða sig. Það fylgir því ekki mikill aukakostnaður að leyfa honum að fljóta með í myndinni sem minningarbrot í huga Bridget. ,,Colin lítur ekkert svo illa út. Hann hefur látið eiga helling við sig. Hver svo sem lýtalæknirinn er þá er sá alger meistari“.
