Sýning á útskriftarverkum þeirra nemenda sem ljúka diplómanámi í skapandi ljósmyndun frá Ljósmyndaskólanum í desember 2024 verður opnuð í Ljósmyndasafni Reykjavíkur föstudaginn 13. desember kl. 16.
Verkin á sýningunni eru fjölbreytt, viðfangsefni nemenda mismunandi og framsetning, listræn sýn og fagurfræði ólík. Endurspegla útskriftarverk nemenda þannig gróskuna í samtímaljósmyndun og fjölbreytta möguleika sem felast í ljósmyndamiðlinum.
Að þessu sinni útskrifast fjórir nemendur: Ingunn Rós Haraldsdóttir, María Ármanns, Sigríður Hermannsdóttir og Vala Agnes Oddsdóttir. Sýningarstjóri er Katrín Elvarsdóttir.
