Grillið á Sögu var lengi rómað fyrir gæði í mat og mikinn lúxus með útsýni yfir sundin blá og borgina alla og þar hafa sest að snæðingi nokkrar af skærustu stjörnum listasögunnar sem áttu náttstað á hótelinu. Þar gerist líka ein vinsælasta sena íslenskrar bókmennta- og kvikmyndasögu þar sem sögupersónur Einars Más Guðmundssonar úr skáldverkinu Englar alheimsins mæta og gera sér glaðan dag.
![](https://eirikurjonsson.is/wp-content/uploads/2024/02/grill1-300x200.jpg)
Grillið er nú partur af Háskóla Íslands eins og flest vita og mörg sem eiga leið um Vesturbæinn og Melana hafa rekið augun í mikið hús í undarlegum stíl sem liggur eins og mara ofan á Sögu og hefur eiginlega étið Grillið með gleri og stáli. Það hafa jafnvel borist fyrirspurnir til HÍ um hvort þetta nýja furðurhús eigi varanlegan samastað á þaki Sögu.
„Nei, alls ekki,“ segir Kristinn Jóhannesson, sviðsstjóri framkvæmda- og tæknisviðs við Háskóla Íslands. „Það er verið er að endurbyggja Grillið í upphaflegri mynd. Til þess að hægt væri að vinna að þessu í vetur var nauðsynlegt að byggja skýli yfir Grillið svo hægt væri að athafna sig óháð veðri og vindum,“ segir Kristinn sem ræðir á vef HÍ um stöðu framkvæmda á Sögu en þangað flytur Menntavísindasvið skólans í haust.