ÞEGAR EVA GERÐIST FEMÍNISTI

    Eva, höggormurinn og presturinn.

    Guðmundur Örn Ragnarsson, prestur og forstöðumaður Samfélags trúaðra, sendir póst með hugleiðingu í aðdraganda Alþingiskosninga:

    Í fyrstu bók Móse er sagt frá því að Djöfullinn kom til Evu í líki höggorms og talaði hana inn á að gerast femínisti.  Hún skyldi fara gegn Guði og feðraveldi hans. Eva vissi samt að það væri hættulegt og hefði dauða í för með sér fyrir hana og Adam.  En Djöfullinn sagði að það ekki rétt vera þótt Guð segði það. Aftur á móti ef hún færi að vilja höggormsins yrðu þau eins og Guð og mundu vita skyn góðs og ills.  Og hvernig fór?  Afleiðing femínisma Evu er sá  að við mennirnir sem vorum góðir og ódauðlegir, erum nú vondir og án samfélags við Guð. Við lifum því aðeins 70 – 80 ár, svo er Evu fyrir að þakka.

    Guð hefur ekki horfið frá skipulagi sínu um Feðraveldi a jörðu. Guð kemur fram í þremur hlutverkum, sem Faðir, Sonur og Heilagur andi. Alltaf í karlkyni. Eftir syndafallið, sem femínistinn Eva leiddi yfir mannkynið, sagði Guð við hana: „Mikla mun ég gera þjáningu þína, er þú verður barnshafandi. Með þraut skalt þú börn fæða, og þó hafa löngun til manns þíns, en hann skal drottna yfir þér.“

    Við losnum ekki undan Feðraveldinu, það er skipan Guðs. En það er til endurlausn frá tortímingu og dauða, frá femínisma og annarri illri breytni okkar manna.  Lausnin felst í eingetnum syni Guðs, Jesú Kristi.  Setjum okkur undir vald hans.

    Nú þegar skammt er í kosningar til Alþingis, skiptir verulega miklu máli að femínistar, eins og Eva taki ekki stjórnina í þessu landi. Nóg er komið af slíku. Femínistarnir munu kalla bölvun yfir þjóðina.

    Auglýsing