Heilsu-Geir sendir póst:
–
Og Ozempic er meira að segja komið með markaðsleyfi á Íslandi. Hér er það hins vegar ekki kynnt í sérlyfjaskrá sem megrunarlyf, heldur sem lyf sem gagnast við sykursýki 2.
Líklegt má þó telja að fæstir sykursýkissjúklingar hafi áhuga á Ozempic, þar sem Sjúkratryggingar taka ekki þátt í kostnaði við það. Sú staðreynd staðfestir í raun að Sjúkratryggingar hafa áttað sig á því að lyfinu er aðallega ávísað til fólks í yfirþyngd. Og þar sem fitufordómar eru ríkjandi í þjóðfélaginu, þá taka Sjúkratryggingar ekki þátt í neinu sem getur gert líf offitusjúklinga bærilegra.
Í bandarískum fjölmiðlum kemur fram að fólk fái Ozempic ávísað til þess eins að halda sér grönnum og sætir það mikilli gagnrýni enda hefur lyfið stundum verið ófáanlegt vegna ásóknar í það.
Ozempic virkar þannig að það hægir á meltingunni og finnur fólk því síður fyrir hungri. Niðurgangur og ógleði eru fylgifiskar notkunar lyfsins, en það mun aðallega vera í byrjun notkunar þess og rjátlast af fólki.
Íslendingar hafa í hundruðavís farið í rúmlega milljón króna aðgerðir til að minnka ummál magans og draga þannig úr lystinni og grennast. Ozempic er ekki gefins, samkvæmt sérlyfjaskrá kostar lyfjapenni með 4 skömmtum af lyfinu um 23 þúsund krónur og dugar í mánuð – einn skammtur í viku. Það er engu að síður töluvert ódýrari valkostur en skurðaðgerð, ekki síst ef viðkomandi offitusjúklingi tekst að minnka þyngdina í þokkalegt horf á hálfu til einu ári.
