Laugardaginn 18. nóvember klukkan 17 verður kveikt á ljósunum á jólakettinum á Lækjartorgi. Dóra Björt Guðjónsdóttir formaður umhverfis- og skipulagsráðs Reykjavíkurborgar kveikir ljósin. Lúðrasveitin Svanur flytur nokkur jólalög og hjónin Grýla og Leppalúði verða á staðnum. Öll eru hjartanlega velkomin!
Jólakötturinn á Lækjartorgi er um fimm metrar á hæð, sex metrar á breidd og lýstur upp með 6500 led ljósum. Hann var settur upp í fyrsta sinn árið 2018 og hefur ávallt vakið mikla athygli á torginu. Hönnun jólakattarins er samstarf Reykjavíkurborgar, MK-illumination í Austurríki og fyrirtækisins Garðlist. Hann mun standa á Lækjartorgi fram að þrettándanum.
Jólakötturinn er ein af best þekktu íslensku jólavættunum. Hann er gríðarstór, eins og segir í kvæði Jóhannesar úr Kötlum um þessa óvætt sem er sögð leggja sér þau til munns sem ekki fá nýja flík fyrir jólin. Hann minnir á svipaðar dýravættir á öðrum Norðurlöndum og á ættir að rekja til þeirra, svo sem jólahafursins sem margir Íslendingar þekkja líka.
Þið kannist við jólaköttinn,
– sá köttur var gríðarstór.
Fólk vissi ekki hvaðan hann kom
eða hvert hann fór.
Hann glennti upp glyrnurnar sínar,
glóandi báðar tvær.
– Það var ekki heiglum hent
að horfa í þær.
