„Sterkasta tréð vex ekki þar sem er logn,“ segir Þorgerður Katrín utanríkisráðherra sem staðið hefur í ströngu og stendur nú frammi fyrir tvísýnum úrslitum þjóðaratkvæðagreiðslu sem verið hefur hennar hjartans mál:
–
„Þessi platti hefur lengi hangið í eldhúsinu mínu og verið mér góð og mikilvæg áminning. Bæði persónulega og í stjórnmálum. Því stórar ákvarðanir eru sjaldnast teknar í logni. Mikilvægustu skrefin í sögu Íslands hafa sjaldnast verið átakalaus. Þau hafa oft kallað fram harðar deilur og sterkar skoðanir. Það eitt hefur aldrei verið ástæða til að sitja hjá.
Ég hef þá bjargföstu trú að taka frekar slaginn fyrir það sem ég trúi á en sitja hjá. Jafnvel þó ljóst sé fyrirfram að mótvindurinn verði töluverður. En hann minnir líka á hvers vegna maður fór af stað. Þessa dagana finn ég það sterkt. Og er óendanlega þakklát fyrir stuðninginn.
–
Umræðan síðustu vikur hefur verið hörð á köflum. Það er skiljanlegt þegar mikið er undir. En þetta mál er stærra en hvert og eitt okkar. Það snýst um framtíð Íslands og þá valkosti sem þjóðin vill eiga. Þess vegna skiptir máli að umræðan snúist um efnið sjálft, ekki persónur og leikendur. Ísland hefur alltaf orðið sterkara með því að mæta stormum af kjarki og sjálfstrausti.
–
Við þurfum ekki að vera sammála. En við eigum að þora að leita svara og fá upplýsingar áður en við lokum dyrum. Það tel ég bæði skynsamlegt og rétt fyrir Ísland.“
