Billy Long, hinn nýi sendiherra Bandaríkjanna á Íslandi, er langt því frá að vera hinn hefðbundni diplómati. Hann er sagður léttur í lund og ófeiminn við að segja það sem hann er að hugsa, sem getur stundum verið óheppilegt. Eitt sinn sagðist hann telja umburðarlyndi fyrir fóstureyðingum vera ástæðu fyrir tíðum skotárásum í Bandaríkjunum. Hann var afar gagnrýninn á bandarísk skattyfirvöld en tók glaður við embætti skattstjóra úr hendi Trump forseta. Hélt djobbinu að vísu bara í tvo mánuði, en þá gerðir Trump hann að sendiherra hér á landi.
–
Billy starfaði lengst af sem sölumaður, uppboðshaldari og útvarpsmaður. Í því starfi tala menn oft mjög hratt og hefur Billy notfært sér uppboðstaktana til að skemmta fólki í pólitískum umræðum. Hann var þingmaður í fulltrúadeild Bandaríkjaþings í 12 ár. Hann var einn af þeim fyrstu til að lýsa yfir stuðningi við framboð Trump í forsetaembætti og segist vera einn af allra fyrstu og dyggustu stuðningsmönnum forsetans.
–
Eftir að hann hætti þingmennsku fór Billy að veita vafasama skattaráðgjöf. Meðal annars reyndi hann að selja skattainneignir sem voru ekki til. Hann þáði 8 milljónir króna í þóknun fyrir þessa svikasölu þar til hann var stoppaður. Það virkaði því ekkert sérlega sannfærandi þegar Trump útnefndi hann skattstjóra. Líklega áttuðu ráðgjafar Trumps sig á því að þetta hefðu verið mikil mistök, enda var Billy settur af tveimur mánuðum síðar og gerður að sendiherra á Íslandi í staðinn.
–
Billy tekur afdráttarlaust undir fullyrðingar Trump um að úrslitin í forsetakosningunum árið 2020 hafi verið fölsuð (stolen) og Trump í raun unnið. Útnefningu Billy í sendiherrastarfið var ekkert sérstaklega fagnað hér á landi þegar fréttist að hann hefði sagt að Ísland gæti orðið 52. ríki Bandaríkjanna, á eftir Grænlandi. Hann baðst síðar afsökunar og sagði að þetta hefði verið tómt grín.
–
Bandarískir sendiherrar hafa oft verið áberandi í þjóðlífinu og margir muna eftir Marshall Brement sem sinnti menningarlífinu hér á landi ásamt eiginkonu sinni. Húðlæknirinn og sendiherrann Jeffrey Ross Gunter vakti nokkra athygli á sínum tíma, aðallega fyrir að óska eftir að bera skammbyssu þar sem hann óttaðist mjög um líf sitt hér á landi.
–
Án vafa mun Billy Long láta til sín taka og reyna að vingast við Íslendinga með sínum létta og sérkennilega persónuleika.
