Rut Bjarnadóttir og Jóhanna V Þórhallsdóttir opna sýningu í Smíðahúsinu á Hólmavík laugardaginn 1. ágúst 2026 kl 14-17. Yfirskrift sýningarinnar er, SENDING. Saga Strandasýslu er tengd því mikla galdrafári sem fór um Evrópu á miðöldum.
–
Fátækt fólk reyndi að hafa áhrif á náttúruöflin og örlögin með því að kalla óræð og dularfull öfl til fulltyngis við sig. Lífsbaráttan var erfið og miskunnarleysi forlaganna viðbrugðið. Alls kyns ráða var beitt. Menn fóru með torskildar galdraþulur, ristu galdrastafi og rúnir og reyndu þannig að breyta tilverunni. Þegar reynt var hafa áhrif á aðra mannveru til góðs eða ills var beitt svokölluðum sendingum. Sumir reyndu að klekkja á óvinum sínum með illkvittinni og yfirnáttúrulegri sendingu. Aðrir beittu sendingum til góðs og reyndu að snúa hug einhvers til ásta eða lækna fólk. Sendingar gátu því verið af ýmsum toga.
–
Venjulega mistókust þessar tilraunir til að breyta gangi tilverunnar með göldrum. Allmargir galdramenn voru teknir af lífi á öldum áður og rit þeirra og tól brennd á báli. En hvað varð um hina sem enginn fann og sakfelldi? Hvernig lauk þeim galdri sem aldrei var vitað um? Hvað varð um allar þær yfirskilvitlegu sendingar sem fóru útí loftið en rötuðu aldrei á áfangastað? Eru þær enn á sveimi?
–
Listakonurnar Rut Bjarnadóttir og Jóhanna V. Þórhallsdóttir reyna með þessari sýningu í Smíðahúsinu Hólmavík að fanga á dúkinn eitthvað af þessum sendingum sem enn eru á sveimi. Sumar þeirra eru bólgnar af illkvitni en aðrar fullar af kærleika,umhyggju og ást. Sendingin hafði á sér ótal andlit. Henni svipar þannig til listarinnar sem getur brugðið sér í allra kvikinda líki. Hún hefur mörg ólík andlit eins og sending galdramanns sem beint er út í regnvota sveit. Listin er eilíf á sama hátt og galdurinn vegna þess að góð list er full af galdri, fjölkynngi og forneskju, en er alltaf ný og fersk. Nú er að njóta sendinganna á veggjunum og reyna að átta sig á sendanda og viðtakanda.
