Vonsvikinn viðskiptavinur sendir skeyti:
–
Biðraðirnar tvær í Costco náðu inn að hinum enda hússins síðastliðinn laugardag. Fullir innkaupavagnar siluðust áfram á hraða snigilsins.
–
Vissulega má búast við mannfjölda í þessari vinsælu verslun á almennum frídegi. Andlitið datt þó af flestum þegar þeir komu fyrir hornið og sáu að af 12 afgreiðslukössum voru aðeins 6 þeirra mannaðir. Það er litlu meira en á venjulegum þriðjudegi.
–
Þegar Costco opnaði fyrir 9 árum flykktust landsmenn í búðina. Vissulega voru raðirnar langar, en þá var afgreitt á hverjum kassa. Jafnt og þétt virðist þessi þjónusta hafa dregist saman. Samt virðist ekki vanta starfsfólkið í Costco, því út um allt eru mannaðar smakkstöðvar.
–
Costco á Íslandi hefur ekki brugðist við þessari eyðslu á tíma viðskiptavina með sama hætti og Costco verslanir erlendis. Þar er víðast hvar búið að setja upp sjálfsafgreiðslukassa og „scan and go“ lausn svipað þeirri sem Bónus og Krónan bjóða upp á.
–
Auðvitað geta viðskiptavinir einfaldlega sleppt því að versla í Costco um helgar og sparað sér leiðindin. En fyrir margt vinnandi fólk er enginn annar tími í boði.
