Húsmóðir í Vesturbænum:
–
Í Costco eru staflarnir af ódýrum blautþurrkum í risastórum umbúðum. Á þeim stendur að óhætt sé að sturta þeim niður úr klósettinu. Þetta er rangt. Blautþurrkurnar stífla dælustöðvar fráveitunnar og í mörgum tilfellum sjálf klósettin. Af því eru sagðar reglulegar fréttir að hleypa þarf óhreinsuðu skólpi út í fjöruna meðan blautþurrkur, smokkar, dömubindi og tannþráður eru hreinsuð úr síunum.
–
Blautþurrkurnar eru ekki úr pappír eins og klósettpappírinn, heldur úr plasti. Þær leysast ekki upp í klósettinu eða skólprörunum.
–
Costco er svo sem ekki eitt um að fullyrða að sturta megi blautþurrkunum niður. En í Costco kaupa flestir blautþurrkurnar, því þær eru á hagstæðasta verðinu í þessum stóru pakkningum – 632 blautþurrkur í hverjum pakka. Það er hægt að stífla hressilega með slíku magni.
–
Réttast væri af Veitum að senda Costco og hinum verslununum reikninginn fyrir hreinsunarstarfinu. Best væri þó ef foreldrar ungbarna hefðu sjálfir vit á því að setja blautþurrkurnar ekki í klósettið. En hver láir þeim, það stendur jú á umbúðum að það megi.
–
Að sjálfsögðu gerir enginn kröfu um að yfirvöld geri eitthvað í málinu. Fyrst þarf nefnilega að skipa samráðshóp, svo að skipa nefnd til að semja skýrslu, svo að gera drög að reglugerð og fá umsagnir í samráðsgátt stjórnvalda. Og svo að gera ekki neitt frekar vegna þess að enginn fylgir því eftir.
Auglýsing
