VELKOMNIR FLÆKINGAR

    Leiðsögn um sýningu Ingibjargar Dalberg, Flækingar og fastagestir, verður í Hannesarholti á Grundarstíg á morgun, fimmtudag, kl. 18:00-18:30. Hafa skal þetta í huga:

    Með hlýnun jarðar hafa ýmsar framandi fuglategundir fært sig norður á bóginn og flækst hingað heim landsmönnum til yndisauka.

    Flækingar eru af mörgum stærðum og gerðum svo sem bjarthegri og hnúðsvanur sem báðir teljast til sjaldséðra flækingsfugla. Vegna hlýnandi loftslags og með aukinni skógrækt hér á landi sést jafnvel æ oftar til hins agnar smáa glóbrystings sem vona má að geri Ísland að heimkynnum sínum þegar fram líða stundir.

    Bjarthegrinn er tignarlegur og formfagur fugl sem eftirsóknarvert er að skoða og festa á striga þá sjaldan sem til hans sést.

    Athyglisvert er að hnúðsvanurinn hefur ekki einungis borist hingað sem sjaldgæfur flækingur því á tuttugu ára skeiði (1958 – 1977) var Reykjavíkurtjörn heimkynni lítils hóps hnúðsvana sem var vinabæjargjöf frá Hamborg til Reykjavíkur. Svanirnir voru mikil borgar- og Tjarnarprýði á sinni tíð meðan þeirra naut við.

    Einn áreiðanlegasti fastagestur fjölmargra farfugla hér á landi er krían sem treysta má að nemi land hérlendis nánast á sama degi ár hvert. Í bernskuminni var það 14. maí sem krían víðförla snerti Tjarnarbakkann með viðeigandi ærslagangi, hávaða og fjöri.

    Megin viðfangsefni sýningarinnar eru portret af flækingsfuglum, einkum bjarthegrum og hnúðsvönum, en fleiri eftirlætisfuglar svo sem kríur, maríuerlur og hrafnar fá að fylgja með.

    Portret  af börnum koma einnig við sögu á sýningunni.

    Málverkin eru unnin með olíu á striga og mörg unnin með rými hins sögufræga húss, Hannesarholts í huga.

    Auglýsing
    Deila
    Fyrri greinBUBBI (62)
    Næsta greinFYRIR 74 ÁRUM