SEXTUGUR MEÐ STÆL

    Helgi Björns verður 60 ára þann 10. júlí næstkomandi og af því tilefni blæs hann til glæsilegra stórtónleika í Laugardalshöllinni laugardaginn 8. september.

    Helgi hefur átt gifturíkan feril sem söngvari, leikari og athafnamaður. Hann hefur leitt hljómsveitir eins og Grafík, SS Sól, Reiðmenn vindanna og Kokteilpinnarnir; gefið út tónlist með þessum sveitum og í eigin nafni og er fyrir löngu orðinn samofinn þjóðarsálinni með lögum sínum og textum.

    Og nú til að fagna löngum og farsælum ferli á að tjalda öllu til. Helgi mun fara yfir allan ferilinn dyggilega studdur af húsbandi skipuðum færustu hljóðfæraleikurum landsins, bakröddum og góðum gestum.

    Höllinn verður sett í afmælisgír – risaskjáir, sérsmíðað svið, hljóðkerfi og engu verður til sparað til að gera tónleikana sem eftirminnilegasta.

    Auglýsing