SAGT ER…

…að á fimmtudaginn næsta, 13. september kl 17-19, opni sýning Guðbjargar Lindar Jónsdóttur í Gallerí GÖNGum Háteigskirkju. Um myndirnar á sýningunni segir Guðbjörg Lind:

„Landslagsverk mín eru sprottin úr umhverfi æsku minnar vestur á fjörðum og fela í sér tilraun til að skapa veröld á mörkum hugar og náttúru. Þannig eru þau framlenging á mínum eigin hugarheimi.
Viðfangsefni mín hafa löngum tengst vatni, fyrst fossum og síðar sjávarfletinum þar sem eyjar og bátar fljóta á yfirborðinu eða fjallshlíðar og eyrar teygja sig út á hafflötinn. Þráhyggjukennd áhersla á vatn í verkum mínum tengist hrifningu minni á hverfulleika þess og gagnsæi og er líka tengd á einhvern hátt vatnshræðslu minni. Í verkum mínum segir af ferðalagi á vit veraldar þar sem skynja má hið upphafna í sjálfum einfaldleikanum.“

Sýning Guðbjargar er opin alla virka daga kl 9-16 og á messutímum á sunnudögum
Hún verður opin fram í október.

Auglýsing