SAGÐI MÉR AFTUR OG AFTUR AÐ HANN MYNDI DEYJA UNGUR

    Hinn ástsæli leikari og skemmtikraftur, Stefán Karl, hefði orðið 44 ára í dag. Steinunn Ólína Þorsteinsdóttir minnist hans með fallegri kveðju á samskiptamiðlum:

    “10. júlí 2019. Afmælisdagurinn hans Stefáns Karls. Stefán sagði mér aftur og aftur allt frá því að við kynntumst að hann myndi deyja ungur. Alltaf fannst mér það heldur ónotalegt þegar hann hafði orð á því. Hvernig gat hann vitað það? Þegar ég lít til baka þá bar allt hans skap og æði þessari innri vissu hans vitni. Hann var þyrstur í lífið og þurfti að smakka á því eins og sagt er. Notaði tímann betur en aðrir og afrekaði á við marga menn á stuttri ævi.

    Það er ekki liðið ár síðan hann dó og hann fylgir fjölskyldunni eins og hlýr vindur. Sumir dagar eru þyngri en aðrir, ekkert verður aftur samt, en smitandi lífskrafturinn sem Stefán bjó yfir hefur gefið fjölskyldunni þrek til að halda áfram og njóta þess að vera til.

    Í dag ætla ég að dvelja við góðu minningarnar, öll skemmtilegheitin sem hann gaf okkur og lífsgleðina sem ávallt var hans aðalsmerki.

    Elsku vinur, í dag bökum við krakkarnir Betty Focker þér til heiðurs. Við vitum að þú ert að byggja eitthvað stórkostlegt í framtíðarlandinu og ætlum ekkert að tefja þig við það. Við elskum þig.”

    Auglýsing