MARTRÖÐ Á HVERFISGÖTU

    Ásmundur Helgason og Elín Ragnarsdóttir hafa rekið Gráa köttinn á Hverfisgötu um árabil.

    “Blessuð Hverfisgatan,” segir Ásmundur Helgason sem rekur morgunveitingastaðinn Gráa köttinn í götunni ásamt Elínu eiginkonu sinni. Allt gekk vel þar til borgaryfirvöld fóru að láta hressa upp á götuna með skeflilegum afleiðingum eins og Ásmundur tíundar hér:

    “Framkvæmdir sem hófust 20. maí og áttu að klárast í kringum menningarnótt, ja, þeim er ekki enn lokið. Það er útlit fyrir að framkvæmdatíminn lengist um 100% – fari úr áætluðum þremur mánuðum upp í 6 mánuði. Að minnsta kosti. Hvernig hægt er að klúðra þessu verki svona ofboðslega er óskiljanlegt.

    En áhrifin eru ekki óskiljanleg. Fjórir veitingastaðir farnir á hausinn við þennan spotta Hverfisgötunnar og staðurinn okkar Ellu, Grái kötturinn, rétt lafir. Uppsafnaður taprekstur frá því í sumar eykst með hverri vikunni, með hverri vikunni sem verkið tefst.

    Allar upplýsingar um framkvæmdatíma hafa reynst rangar. Borgarstjóri sagði í ágúst að þetta myndi klárast í september. Upplýsingar frá borginni í september um að verkið myndi klárast í október reyndust líka rangar. Hvernig má það vera að verkkaupinn hefur í raun enga hugmynd um hversu langan tíma tekur að klára svona verk? Verkhlutar sem eiga að gerast í „næstu viku“, gerast þrem til fjórum vikum síðar. Allar upplýsingar um tíma hafa reynst rangar. Líka þær um hvað átti að gerast eftir hádegið í gær. Þá átti að byrja að helluleggja norðan megin – en ekkert gerðist.

    Nú eru rangalar af grindverkum upp og niður Hverfisgötuna frá Ingólfsstræti upp að Smiðjustíg. Verktakinn vandar sig lítið við að greiða aðgang að okkar litla veitingastað og setur upp skilti þar sem stendur LOKAÐ – og vill meina að það eigi bara við bílaumferð. Gangandi fólk sjái alveg að það þurfi ekki að fara eftir þeirri skipan. Við þurfum sjálf að færa til grindverk um helgar til þess að fólk komist til okkar. Samt segir í útboðslýsingunni að verktaki skuli hafa sem greiðastan aðgang að rekstraraðilum á svæðinu.

    Borgarfulltrúinn sem er formaður skipulagsráðs svarar ekki tölvupóstum, sem fyrr, og firrir sig þannig allri ábyrgð. Því spyr ég hana hér; Sigurborg Ósk Haraldsdóttir, hefur borgin tekið afstöðu til þess að greiða okkur bætur vegna hinna miklu tafa sem hafa verið við framkvæmdir á neðri hluta Hverfisgötu?

    Þetta klúður hlýtur að kalla á tafabætur til handa borginni frá verktaka og ég spyr, hver fær þær bætur? Hefur borgin orðið fyrir skaða vegna tafa á verkinu? Svarið er líklega nei, en við sem rekum lítil fyrirtæki við götuna höfum orðið fyrir miklu tjóni.

    Annars er merkilegt hvað borgin virðist standa illa að þessu verki. Það var boðið út 3. apríl og tilboð opnuð 23. apríl. Þremur vikum síðar á lægstbjóðandi að byrja verkið. Átti sem sagt að vera tilbúinn með mannskap á þeim tíma. Þetta er uppskrift að töfum, verktaki getur ekki verið fullmannaður í þeirri von og óvon að fá verkið. Af hverju var verkið ekki boðið út t.d. í febrúar? Af hverju fengum við sem störfum við götuna ekki að vita af þessu fyrr en viku fyrir framkvæmdir?

    Af hverju stafa allar þessar tafir? Það er verið að færa þennan hluta Hverfisgötunnar í sama búning og efri hlutann, þannig að allir verkþættir eru þekktir. Þær skýringar sem hafa komið fram á töfum eru ekki trúverðugar. Það að það hafi verið klöpp undir götunni getur t.d. varla komið á óvart. Nafnið Klapparstígur (sem er þarna rétt ofar) ætti að gefa vísbendingu. Það að eitthvað eitt rör hafi ekki fundist skýrir ekki þriggja mánaða töf. Við sem verðum fyrir tjóni á hverjum degi höfum ekki fengið neinar skýringar, sem við getum trúað á, töfunum. Við höfum hins vegar séð hve fámennur hópur vann við verkið í sumar og fjölmarga daga var hreinlega enginn að vinna í verkinu.

    En Grái kötturinn er enn opinn. Og allir eru velkomnir.”

    Auglýsing