HUNDAR BANNAÐIR VIÐ VÍFILSSTAÐAVATN VEGNA VEÐURS

    Hundum er bannaður aðgangur í friðlandi Vífilsstaðavatns yfir varptímann tímabilið 15. apríl til 1. júlí. Ákveðið hefur verið að framlengja hundabannið til 1. ágúst nk. vegna seinkunar á varpi hjá flórgoða og öðrum fuglum við vatnið, varptíma virðist hafa seinkað út af köldu og votviðrasömu vori og sumri.

    Hundaeigendur, veiðimenn og útivistarfólk er vinsamlegast beðið um að vernda fuglalífið í friðlandi Vífilsstaðavatns og virða friðhelgi fugla um varptímann, ganga vel og snyrtilega um svæðið og virða umgengnisreglur sem víða má sjá á skiltum í friðlandinu.

    Fuglalífið er fjölskrúðugt við Vífilsstaðavatn og eru flórgoðar sérstaklega velkomnir gestir. Undanfarin vor hefur Garðabær sett út í Vífilsstaðavatn hreiðurstæði úr birki- og víðigreinum til að hjálpa flórgoðunum að koma upp hreiðri og ungum. Þessa aðstoð hafa þeir þegið og nýtt sér til hreiðurgerðar og hafa þannig gert gestum friðlandsins mögulegt að fylgjast með atferli þessa sérstaka og skemmtilega fugls.

    Flórgoðar eru miklir sund- og kafsundsfuglar en þeir eiga erfitt með gang og ganga því helst ekki á land. Fyrri part sumars er jafnvel hægt að sjá tilkomumikinn tilhugalífsdans þeirra en hjúskapur flórgoða er einkvæni. Jafnræði er í störfum maka og verja þau óðal sitt langt umhverfis hreiðrið, virðist stærðarmunur fuglanna þá engu máli skipta því sést hefur til flórgoða reka heila álftafjölskyldu út á mitt vatn. Flórgoðar verja unga sína af hörku og ferðast gjarnan með þá á bakinu.

    Nú er auðséð að varp er í gangi í báðum hreiðurstæðunum, því annar fuglinn er á vakt umhverfis þau, en engir ungar sjást ennþá.

    Auglýsing
    Deila
    Fyrri greinSAGT ER…
    Næsta greinSAGT ER…