GUÐMUNDUR ANDRI LÉTTIST UM 10 KÍLÓ

    Guðmundur Andri fær sér hressingu.

    Guðmundur Andri Thorsson rithöfundur og þingmaður léttist um 10 kíló þegar hann ákvað að hætta að borða sykur í óhófi. Og var ástæða til eins og hann segir sjálfur:

    “Pabbi var með sykursýki 2, afi minn líka og afabróðir og raunar fleiri í fjölskyldunni. Ég hef alltaf verið meðvitaður um þann möguleika að fá sjúkdóminn, en staðráðinn í að forðast það. Ég er hins vegar átvagl og súkkulaðisvelgur: súkkulaðiís með súkkulaðisósu og þeyttum rjóma með dökkum súkkulaðispænum … það er mitt nirvana …

    Fyrir nokkrum árum sagði læknirinn minn við mig að ég væri kominn að hengifluginu og þyrfti að draga úr sykuráti. Ég notaði tækifærið, hætti þá að borða öll sætindi, allt nammi, allar kökur, allt frá Mjólkursamsölunni, hvað þá óþverra á borð við kók sem ég hef aldrei verið sólginn í, en nýt sykurs áfram í ávöxtum og drekk áfram létt vín í hóflegu hófi. Fyrir vikið fór blóðsykurinn nægilega langt niður til að ég þyrfti ekki að hafa áhyggjur af því að fá sykursýki; ég losnaði við tíu kíló, fékk aukinn þrótt til að takast á við daglegt líf, varð léttari á fæti og léttari í lund, endurheimti spékoppa í andliti. Ég læt duga að úða aðeins í mig sörum kringum hájólin og stundum hnusa ég af súkkulaðimolum. Hefði ég haldið áfram á sömu braut hefði ég fengið sykursýki og þá hefði mitt heilsuvandamál verið orðinn vandi samfélagsins líka með tilheyrandi kostnaði fyrir aðra.

    Við getum sjálf tekið ábyrgð á heilsu okkar en það er líka ágætt að samfélagið setji þann kostnað sem af neyslu varnings getur hlotist inn í verð vörunnar sjálfrar með skatti, til að mynda á kóki og slíkum drykkjum. Það er ekki forræðishyggja heldur umhyggja.”

    Auglýsing
    Deila
    Fyrri greinWALT DISNEY (116)
    Næsta greinSAGT ER…