“Mér finnst svo hallærisleg þessi þróun þar sem æ fleiri fyrirtæki auglýsa eftir „leiðtogum“.
Svona svæfum við orðin og gerum þau merkingarlaus,” segir Sverrir Norland rithöfundur og útgefandi:
–
“Plús hvað það er hlægilegt að vinnumarkaðurinn sé að tútna út af „leiðtogum“ þegar við vitum öll að vinnumarkaðurinn er meira og minna hannaður í kringum undirgefni og hlýðni.
Flestir fara í skóla þar sem markmiðið er að fá góðar einkunnir og sækja svo um vinnu og fá þar „yfirmenn“ og þurfa að taka mark á þeim og berjast fyrir þeim hagsmunum sem þeir fá borgað fyrir að vernda.
–
Hluti af slíkri undirgefni er svo einmitt að taka við stöðu þar sem maður fær stimpilinn „leiðtogi“. Einhver segir þér að þú sért leiðtogi … svo að þú þarft ekki að gera neitt sem breytir þér í raunverulegan leiðtoga.
–
Sem sagt: ég held að „leiðtogi“ geti aldrei orðið starfstitill. (Sorrí ef 50% vina minna bera nú þennan starfstitil.)
–
En … okkur vantar einmitt fleiri raunverulega leiðtoga og stjórnendur. Mér detta í hug nokkrir – á sviði loftslagsmála til dæmis – en okkur vantar miklu fleiri slíkar raddir – í stjórnmálum, í listum, í viðskiptalífinu. Fólk sem þorir að segja það sem það hugsar frekar en að vera bara málpípur viðskipta- og stjórnmálaafla. Þannig ryðja alvöru leiðtogar nýjar brautir.
–
Við þurfum fólk sem er leiðtogar frekar en í dagvinnu sem leiðtogar.
Já, takið það og troðið því í andlitin á ykkur! Þetta var sunnudagshugvekja dagsins. Og nú ætla ég í kaffi til mömmu og pabba.”
Auglýsing
