BORGARSTJÓRI FÉKK ÁFALL

    Degi B. Eggertssyni borgarstjóra er brugðið. Lýsingar íþróttakvenna á samskiptum við eldri menn og þjálfara í æskulýðsstarfsemi íþróttafélaga, sem að mestu er borin uppi af sveitarstjórnum, slá hann út af laginu og hann segir:

    Það er áfall að lesa frásagnir íþróttakvenna í krafti #metoo byltingarinnar. Brotin eru gróf og jafnvel grófari en í frásögnum annarra kvennahópa sem við höfum heyrt undanfarið og þolendurnir oft ungir. Ábyrgð gerenda er vitanlega grundvallaratriði en ábyrgð samfélagsins að hlusta nú ekki aðeins á frásagnirnar heldur bregðast við er ótvíræð og mikil. Um það snýst líka ákall íþróttakvennanna.

    Íþróttir, íþróttaþátttaka, íþróttafélög og íþróttahreyfingin í heild hafa verið aðalsmerki og stolt samfélagsins. Og við höfum oft í ræðu og riti fjallað um jákvæð áhrif þeirra. Samfélagið og sveitarfélögin hafa staðið myndarlega á bak við íþróttastarf með uppbyggingu og margvíslegum styrkjum. Við eigum því að finna til ábyrgðar og líta á það sem forgangsmál og frumskyldu að kynferðisleg áreitni eða ofbeldi verði ekki liðin í tengslum við íþróttastarf, keppni og æfingar.

    Allir iðkendur, foreldrar þeirra og forráðamenn og allir sem koma að íþróttastarfi yfirleitt verða að geta treyst því að það sé öruggur vettvangur og að tekið sé á þeim málum sem koma upp af fagmennsku og festu. Í því felst að staðið sé með þolendum og þeim veittur nauðsynlegur og eðlilegur stuðningur. Og þetta snýst líka greinilega einnig um breytta menningu, og jafnrétti á öllum sviðum.

    Ábyrgð forystu íþróttafélaga og íþróttahreyfingarinnar í heild, ásamt ábyrgð sveitarfélaganna sem fjármagna stóran hluta starfseminnar er alveg sérstaklega skýr þegar kemur að því að taka nú boltann og stíga markviss skref til að bæta úr. Ég hef þegar verið í sambandi við forystu Íþróttabandalags Reykjavíkur til að bjóða fram stuðning borgarinnnar við viðbrögð og úrvinnslu einstakra mála, stuðning við gerð ferla og viðbragðsáætlana þar sem slíkt vantar. Það á að vera sameiginlegt forgangssverkefni að tryggja algjört öryggi iðkenda og allra annarra sem koma að íþróttamálum – að ótöldu umhverfi jafnréttis og virðingar í öllum samskiptum. Annað kemur ekki til greina. Ég vil þakka íþróttakonunum sem að baki ákallinu standa alveg sérstaklega fyrir hugrekkið og forystuna. Nú tökum við höndum saman og gerum þær breytingar sem þarf.

    Auglýsing