ÁSTARTJÖRN Í HAFNARFIRÐI

    Ástartjörnin við hliðina á N1 í Hafarfirði og Björgvin aka Lubbi klettaskáld.

    Borist hefur póstur:

    Sæll Eiríkur. Björgvin heiti ég og er Gunnarsson. Ég var að lesa umfjöllun þína um ástarvötn hér og hvar um heiminn – sjá hér –  og vildi senda þér mynd af tjörn sem er nokkuð hjartalaga. Tjörnin er staðsett við hliðina á N1 við Lækjargötu í Hafnarfirði. Ég samdi meira að segja ljóð um þessa tjörn um daginn en ég hef gefið út 6 ljóðabækur undir listamannanafninu Lubbi klettaskáld. Hér er ljóðið og myndin.

    RÓMANTÍK OG RISTAÐ BRAUÐ
    það er örlítil tjörn á milli blokkarinnar sem ég bý í í lækjargötunni
    og enn einn sjoppunar í nágrenninu
    ég geng alltaf framhjá þessari tjörn
    ef ég er orðinn aðframkominn
    og neyðist til að svindla á gosbindindinu
    þessi örlitla tjörn er hjartalaga og það finnst mér fallegt
    eða sko, hún er bara hjartalaga
    frá ákveðnu sjónarhorni
    sem maður sér eiginlega aðeins
    þegar maður er að ganga í átt að sjoppunni
    á leiðinni til baka líkist tjörnin
    helst sveigðri rafmagnsrakvél
    ekki alveg eins rómantískt og hjarta en hey,
    lífið er ekki alltaf rómantík og rauðvín,
    stundum er það bara rakvél og ristað brauð
    stundum lekur sápa frá þvottastöðinni hjá enn einum
    og út í tjörnina en þá myndast rák í hana
    og þá ímynda ég mér, þegar ég geng framhjá á leið í sjoppuna,
    að nú sé hjartað hreint
    en samt er tjörnin þá einmitt skítug, menguð
    en ekki þegar ég er á leiðinni í sjoppuna,
    bara á leiðinni til baka
    Auglýsing